IО ЧЕЛОВЕЦЕХ НЕЗНАЕМЫХ НА ВОСТОЧНОЙ СТРАНЕ И О ЯЗЫЦЕХ РОЗНЫХ.(По рукописи Императорской публичной библиотеки, Погод. № 1572,лл. 112-114 об.)
|
|
На восточной стране, за Югорскою землею, над морем, живут люди Самоеды, зовомыи Малгонзеи. Яд их мясо оленье да рыба, да межи собою друг друга ядят. А гость к ним откуду придет, и они дети свои закалают на гостей да кормят; а которой у них гость умрет, и они того снедают, а в землю не хоронят, а своих також. Сии ж люди не великий возрастом, плосковиды, носы малы, резвы велми и стрелцы скоры и горазди. А ездят на оленех и на собаках, а платье носят соболие и оление, а товар их соболи. В той же стране, за теми людми, над морем живут иная Самоед такова: инная словет; лете месяц живуть в море, а на сухе не живут того деля: того месяца понеже тело на них трескается, и они тот месяц в воде лежат, а на берег не могут вылезти. В той же стране, за теми людми, над морем, есть иная Самоед: по пуп люди мохнаты до долу, а от пупа вверх - как и прочий человеци. А яд их рыбы и мясо; а торг их соболи, да песцы, да ныжы, да оленьи кожы. В той же стране, за теми людми, над тем же морем, иная Самоед такова: вверху рты, рот на темени, а не говорят; а видение в пошлину человеци; а коли едят, и они крошат мясо или рыбу да кладут под колпакы или под шапку, и как почнут ясти, и они плечима движут вверх и вниз. В той же стране, за теми людми, есть иная Самоед такова, как и прочий человеци; по зиме умирают на два месяца. Умирают же тако: как где застанет которого в те месяци, то туто и сядет, а у него из носа вода изойдет, как от потока, да вымерзнет к земли; и кто человек иные земли неведанием тот только отразит, у него спхнет с места, ин умрет, то уже не оживет; а не сопхнет с места, то той оживет и познает и речет ему: "О чем мя еси, брате, поуродовал?" А оживают, как солнце на лето поворотится. Такоже на всяк год оживают и умирают. В той же стране, в верху Оби реки великиа, есть такова земля: Балд именуется; леса на ней нет. А людие на ней, как и прочий человеци, живут в земле, а ядят мясо соболи; а иного у них звери некоторого нет, опроче соболиа. А носят платие соболие и рукавицы и ногавицы, а иного платиа у них нет, ни товару никоторого; а соболи ж у них черны велми и великы; шерсть жива соболи по земли ся волочит. В той же стране есть такова Самоед: в пошлину аки человеци, но без голов; рты у них меж плечима, а очи в грудех. А яд - их головы сырые оленьи; и коли им ясти, и они головы оленьи взметывают собе в рот на плечи и на другый день измещут из себя туда же. А не говорят. А стрелба ж у них такова: трубка железна в руце, а в другой руце стрелка железна, да стрелку ту вкладывает в трубку да бьет молотком в трубку ту. А товару у них никоторого нет. В верх тоя ж реки Оби великиа, в той же стране есть иная Самоед: ходят по подземелью иною рекою день да нощь со огни, и выходят на озеро, и над тем озером свет пречюден, и град велик стоит над тем же озером, а посада нет у него; и коли поедет кто ко граду тому, и тогда шум велик слышати в граде том, как и в прочих градех; и как приидут в него, ино людей в нем нет, ни шуму не слышати никоторого, ни иного чего животна, толико во всяких дворех ясти и пити много всего и товару всякого, кому что надобет, и прочь отходят; а кто без цены возмет и как прочь отойдет, и товар у него изгинет, обрящется пакы в своем месте; и как прочь отходят от града того, и шум паки слышати, как и в прочих градех. Во восточной же стране есть иная Самоед, зовома Каменьская, облежит около Югорьские земли. А живут по горам по высоким, а ездят на оленех и на собаках, а платие носят соболие и оление; а яд их мясо оленье да собачину и бобровину сыру ядят, а кровь пьют человечю и всякую. Да есть у них таковы люди лекари: у которово человека внутри нездорово, и они брюхо режут да нутрь вымают. Да в той же Самоеди видали, кажут, Самоед же, старые люди с горы подле море мертвых своих идут, плачющи, множество их, и за ними идет велик человек, палицею железною погоняя их. |
|
Страницы |